Home » 讀者投稿 » 29Jun2014 香港人輸了

29Jun2014 香港人輸了

10413399_10152536429691337_6066036539827899043_n

 

圖/文:特約作者 Cody      整理:舒寧

 

昨晚我們輸了,香港人輸了,我哋失去的不只是東北的一片土地,我哋失去的是香港人驕傲的民主政制,三權分立,互相監察的制度。

好多人話我哋不理性,為反而反,無論政府做乜都反對,但如果政府做得好的話,我哋又有乜理由要上街抗爭呢?政府點解要用咁粗暴手段去通過呢個咁大爭議嘅議題呢?

又有人話議員為反對政府而唔理民生議題,但其實政府可以主動改變議題程序,將醫院重建、教育、民生等議題先討論,將新界東北撥款的投票押後。點解政府唔去做?到底係邊個放棄人民?

好多人話我哋抗爭嘅人無嘢好做,係廢青,但唔好唔記得毛澤東當時都係18歲就投入革命軍,及後曾主張「湖南的事應由全體湖南人民自決之」,但同樣嘅事喺今時今日發生就俾老共話係港獨。其後國共內戰, 從整風到反右, 從大躍進到四清運動,再到文化大革命,期間殺咗幾多人?有幾多人因為佢而失去生命?一個政權如果自己唔反思,無自我反省嘅能力,又有乜資格去批評其他人嘅對與錯?香港好多機構、好多人,為咗自己嘅收入,前途,進升機會,去做自己唔想做嘅嘢,人各有志我哋唔怪得人,但佢哋下一代就要承受因佢哋所做嘅事而有嘅後果。你估佢地唔知咩?但佢地一早已經送晒老婆仔女走啦,如果佢哋係咁愛國愛港,就唔應該送晒啲仔女去英國讀書,諗住做唔成特首就返英國定居呀?白皮書都話要治港者愛國愛港,咁不如要求所有立法、司法、行政人員及其家屬唔可以擁有中國以外嘅國藉或居留權,更唔可以有任何外國物業或資產,到時候睇下有幾多人會留低?幾多人肯做?而家啲抗爭嘅後生仔,咪就係因為香港係佢哋唯一嘅家,先會咁激動,點解啲人唔反思吓佢哋背後原因而只看表面?

今日,政府可以用發展為由將議案強行通過,他日政府可以話要保持國家安定,強行通過二十三條以全方位監控言論;可以用訊息準確為由,來收篇所有傳媒機構,所有新聞由政府新聞處統一發放;可以為保障社會安全,要求買刀要實名制……因為現有政權、政客以及選舉制度,將所有最醜陋的可能都變成了事實。

好多人問我驚唔驚,我可以好肯定答:「驚!真係好驚」,我噚日喺天橋望落去政總外,曾經有一刻想過退縮,但想起有一個坐著電動輪椅的人因衝擊立法會被捕(編按:張超雄議員的助理),我就知道自己已無路可退。因為呢件事,我出發前仔細檢查過我的行裝,把扣在門匙上的指甲鉗除下,因為我有可能因這指甲鉗而變成「藏有危險及攻擊性武器」因而被警方檢控。

 

facebook

Comments

comments