09SEP2014 始作俑者,其無後乎?

10659455_842415429124460_7003870775097995034_n

圖/文:枯名

大學生,中學生參加罷課, 但係掛住道德旗幟既偽道德佬, 就發動告密,鼓吹大量起學生底,對於有學生會參加罷課既學校,實行公開各稱,吹花人地間學校。 呢種其實係逼校董會向校長、學生、甚至學校家長施壓既行為,又借家教會打擊校長,唔少家學校既家教會一早俾左派滲透同把持住,上次反國教事件已經露哂底,正正常常既大多數家長日日為搵食胃口奔馳,邊有咁多閒情逸致熱心攪家教會?

周融響記者會說話期間, 仲一臉扮道德佬,但又氣火燄逼人,真係以為武俠小說中盟主號令武林。大有:“我有上面撐,你吹我脹咩?哈哈哈哈…“之勢,呢個係我睇到佢既動作言辭既感覺,其氣勢既一時無兩,其英氣既不凡,拍得住當年墨索里尼。 而佢身邊兩位雄性, 說話就更加語不驚人死不休, 其中一件話要罷課人士湊唔夠數目,所以中學生要攪罷課,遲d就小學,甚至幼稚園,又指罷課係最後警告,附近地區最後警告完就開槍。 三言兩語就駁到, 首先,罷課係一個文明社會中,溫和表達,但又係層次較高既表態行為,係知識份子響非暴力抗爭運動中常見, 由四五運動、香港金中學風潮、美國反戰、黑人平權、南韓反獨裁、以致伊朗反巴列維王朝既社會運動中,都出現過罷課,目的係弱勢知識份子向社會宣示當代受緊咩危機。

又可以話,罷課,係弱勢者一種悲情表達既選擇,而罷課者推手可以係學生本人,甚至係家長,未必係校方有心推動,但依家好明顯係有人想將罷課責任塞哂落校方,從而逼校方制止學生,學生家長 參與罷課。根本漠視學生本身獨立思考存在,同相關家長既選擇,活脫脫既高高在上而望下。 如果到有一日,真係有家長叫自己讀小學,幼稚園既仔女罷課, 咁香港當時就一定極之可悲,但我又諗唔到一個理由佢一定唔會發生喎。 其次,所指“響鄰近地區,最後警告完就出槍“,就更加無厘頭,香港大把槍,不過就響差館同軍營,泛泛蟻民屋企氣槍都未必有支,唔好話會用核彈丫笨?無限申延都有個譜丫?

學生運動,向來不用暴力,其後 生衝突,係因為防暴警圍困同掃盪在先。鄰近地區學生出到武力例子,67暴動有人罷課派傳單整土製菠蘿,唔知咁算唔算呢?

小弟不才,未有機會讀過大學, 對於有機會接受到高深教育既人, 心存敬佩。 我雖然未讀過大學, 但幾十年響社會打滾令我知道, 大學之道,係明事理,辨是非,有獨立思考,學術自由,要做社會良心。 而呢d價值,係做而唔係齋講,亦唔係由早餐講到宵夜,由瞓覺講到疴屎,掛個名叫“正義“既招牌就 正自己好正義,行俠客,雖則呃人最高境界係呃埋自己,都唔好走火入魔。 口講正義,實際卻不, 將僅有既智慧用響邪惡上面, 歷史上口裡對皇帝恭敬, 實為奸侫者之閹黨弄臣, 最為常用。 金庸小說《笑傲江湖》裡面既岳不群, 係反映邪惡角色, 叫人唔好做呀, 唔係叫人走去學架。

我而家就落條單, 睇下第日中唔中, 日後分分鐘會伸延到將參與佔中者逐個影相,逐個起底, 然後公開批判, 甚至會有人呼籲將佢地既身份通知相關機構,公司,政府當局, 務求趕絕參與員支持社運人士, 令佢地失業冇得撈,冇人請,冇前途,冇政府工做…,要佢地惹上政治痲瘋。 咁如果呢條單真係靈左, 結果又點? 可以想像保皇人士,悉心安排派港讀書後而持有本地學歷者, 就可以堂而皇之悉時填位,充斥住政府、同政府有生意來往既公司,社會機構,咁就完成打壓,滲透 挖牆腳三步曲,主導哂言論。

以往相似既事件曾經響大陸發生過, 當年就算係文革之後, 曾被打成黑五類,被批鬥者, 想搵教席,專業,文化工作,通通碰壁,打政府工就更加唔使望,總之被打壓到乞米, 掃街都冇得你做, 除非你有過人氣魄, 勁到薄熙來咁犀飛利, 夠薑到砌老豆薄一波生豬肉, 咁就夠哂光宗耀祖。 相反空有一身學識好本領, 而俾人打壓者, 最後只能成為一名普通農民, 開下山,劈下石, 種下田,咁就一世, 以前有運既, 就可以游水黎香港, 重建新生活, 呼吸下自由好多既空氣, 不過發生響香港, 依家就只可以游出浮台, 響無路可退之下, 仲可以做咩? 周生就例外, 因為佢陷家有居英權。

始作俑者,無後乎?